--Ads--
BAGUIO CITY - Matuttutukan ita ti dua a pribado a pagagasan ditoy Baguio City gapu iti kababa ti vaccination acceptability manipod kadagiti health workers dagitoy.
Sigun kenni Mayor Benjamin Magalong, dagitoy ket ti Pines City Doctors' Hospital ken ti Notre Dame Hospital.
Inaklonna a maysa a karit ita ti panakaguyugoy dagiti health workers dagiti dua nga ospital a makipaset iti vaccination program ti lokal a gobierno ti Baguio.
Kinunana a maysa a rason ti panagdua-dua dagiti health workers kadagitoy a pagagasan nga agpabakuna ket dagiti maipabpablaak iti social media ken dadduma pay a publications.
Dinakamatna a gapu iti daytoy ket nainget ita dagiti virtual town hall meetings nga ipatpatungpalda tapno maguyugoy dagiti health workers a makipaset iti vaccination program ken maipaka-ammo kadagitoy ti sungbat dagiti pakaseknan dagitoy.
Iti baet daytoy, impannakkel ni Mayor Magalong nga in-inot a ngumatngato ti vaccination acceptability ti Baguio General Hospital and Medical Center ken ti SLU Hospital of the Sacred Heart.
