Dumanon iti nasurok lima gasut a ribo nga indibidual ti addaan ti doble wenno adu a panagrehistro para iti 2025 May election.
Maibasar iti datos ti Commission on Elections (Comelec), nakamonitor dagitoy iti pakabuklan a 532,837 nga aplikante ti addaan ti duplicate fingerprints iti automated fingerprint identification system (AFIS) manipod Hulio agingga Setiembre 30, 2024.
Gapu iti dayta, kinuna ni Commission on Elections chairperson George Erwin Garcia a posible a mangipilada ti reklamo kontra kadagiti addaan ti doble wenno adu a panagrehistro.
Nupay kasta, inlawlawagna nga imbestigaranda ti posible a rason ti pannakadoble ti panagrehistro dagitoy.
Maipalagip nga itay laeng kallabes, inlawlawag dagiti eksperto ken ti Korte Suprema a ti maysa a tao ket addaan laeng ti maysa a fingerprint uray pay dagiti agsingin a tao.
Kabayatanna, naituding nga agsasabat dagiti amin a Commission on Elections Election Registration Boards (ERBs) sakbay ti ngudo ti agdama a bulan para iti special meeting tapno maikkat dagiti aplikante a doble wenno adu ti panagrehistroda.
Maibasar iti kaudian a datos ti nasao nga ahensia, maiparparangarang a ti bilang dagiti botante para iti National ken Local Elections inton 2025 ken Bangsamoro election ket pakabuklanen iti nasaurok 68 milion.
