BAGUIO CITY – Nakasaganan dagiti nagduduma a flower shops iti siudad ti Baguio a mangidiaya iti nagduduma a sabong, bouquets ken dadduma pay a kombinasyon para iti umdani nga aldaw dagiti puso.
Iti interview ti Bombo Radyo, kinuna dagiti vendors iti Harrison Flower Shops nga inton Sabado ken Dominggo nga umado dagiti kustomer dagitoy.
Naamuan a magatang dagiti nagduduma a kombinasyon wenno customized a bouquets sadiay iti P1,000 agingga P1,500 bayat nga adda met dagiti magatang iti P500 ken P50.
Sigun kadakuada, bassit ita ti suplay ti sabong gaputa bassit dagiti cut flower growers a nagmula iti probinsia ti Benguet a kangrunaan a pagtataudan ti suplay dagitoy iti sabong.
Kabayatanna, mangnamnama met ti maysa a flower shop sadiay Assumption Road, Baguio City a makatulongda tapnu maparagsak ken maipaayan maris ti selebrasyon ti Valentine’s Day iti lokalidad.
Gapu iti daytoy, mangididiayada iti nagduduma a disenyo ti bouquet pakairamanan dagiti customized bouquet nga agpaut iti tallo a lawas ken dagiti traditional bouquet nga agpaut iti makalawas.
Karaman kadagiti baro a diaya ti nasao a flower shop ket ti pinikpikan bouquet a naglaon iti lima a kilo a napulpugan a manok ken dadduma a rekado para iti pinikpikan.
Mangididiayada pay iti care bouquet a nalaon kadagiti kagawaan a pangkontra iti COVID-19; taraki boquet a naglaon iti arak; betel nut bouquet a naglaon iti rekado ti mama ken oh my gulay bouquet a naglaon iti natnateng.
Naglaon met dagiti traditional bouquets kadagiti nagduduma a sabong.
Magatang iti P750-P5,000 dagiti nasao a bouquets.
