BAGUIO CITY – Nakanselar dagiti nagduduma nga aktibidad a pakaur-urnongan dagiti tattao sadiay La Trinidad, Benguet kasaruno ti panakaipasidong ti entero a Benguet iti Modified Enhanced Community Quarantine (MECQ) agingga inton May 23.
Iti panakiyuman ti Bombo Radyo Baguio, dinakamat ni Mayor Romeo Salda a nakanselar ti seremonya dagiti kallaysa ken bunyag nga ak-akomodaren ti opisinana.
Kinunana a karaman daytoy kadagiti nairtengan a paglintegan ti ili kontra iti COVID-19 kabayatan ti MECQ status sadiay malaksid pay kadagiti pagalagadan nga impaulog ti Provincial IATF.
Sigun kenkuana, 30% ti kapasidad dagiti simbaan, mairikep dagiti restaurants para iti dine-in ken agrikep dagiti non-essential establishments.
Agtalinaed met nga alas nuebe ti rabii agingga alas sais ti agsapa ti curfew hours sadiay La Trinidad ken maiparit latta ti panagruar dagiti 18-anyos nga agpababa ken dagiti 65-anyos nga agpangato.
Masurot ti pammilin ti Provincial IATF a tallo nga aldaw ti panakalamay dagiti amin a minatay malaksid no adda pakainaiganna iti COVID-19 ti ipupusay ti maseknan nga indibidual.
Masurot metlaeng ti market day schedule ti La Trinidad manipud Lunes agingga Sabado bayat a half-day ti Domingo para iti disinfection.
Kasapulan laeng ti panangiparang dagiti Authorized Persons Outside Residence iti employee’s ID dagitoy kadagiti border checkpoints.
Innayon pay ni Mayor Salda a naibilin manen ti panagmintinir dagiti packers ken porters ti La Trinidad Vegetable Trading Post iti uniporme dagitoy malaksid iti panagsurotda iti dadduma a paglintegan kontra iti COVID-19.
