BAGUIO CITY – Naibilin ti panakairteng ken nainget nga implementasyon dagiti baro nga estratehia tapnu maaksionan wenno mapasardeng ti ngumatngato a kaso ti panagrames ken panagabuso kadagiti ubbing ditoy siudad ti Baguio.
Kasaruno daytoy ti panakailista ti 15 a kaso ti panagrames iti siudad manipud Enero agingga Mayo ti agdama a tawen a nangato no idilig iti lima a kaso iti kapada a panawen idi napalabas a tawen.
Immuna metten a naireport a nailista ti siudad ti 71 a kaso ti panagabuso kadagiti ubbing, pakairamanan ti insidente ti panagrames manipud Enero agingga Hunyo ti agdama a tawen bayat a nailista ti 76 a kaso iti pakabuklan ti 2020.
Kaaduan kadagiti kaso ti panagrames ken panagabuso kadagiti ubbing ket napasamak iti pagtaengan dagiti biktima ken kadawyan a nangaramid iti krimen ket dagiti kaaruba ken miembro ti pamilya ti biktima.
Kinuna met ni City Social Welfare and Development Officer Betty Fangasan a tapnu maaksionan ti parikut ket ingetanda ti panagwanawan ken ti sistema ti panagreport kadagiti nasao nga insidente nangruna iti lebel ti barangay babaen iti panagtinnulongda kadagiti barangay officials ken iti komunidad.
Iyap-apelana met ti panagbalin a naridam ti publiko iti panagbantayda kadagiti kaso ti panagabuso kadagiti ubbing iti lugarda ken iti dagus a panangireportda kadagitoy iti maseknan nga otoridad para iti napartak ken umno nga aksion.
Dinakamatna nga im-imbestigaranda dagiti maaw-awatda a kaso ken mangipapaayda ti kaskenan nga interventions kas iti legal aid ken psychological wenno psychiatric counseling iti partido ti biktima.
Innayonna pay nga ingetanda dagiti programa ken adbokasiya ti inter-agency Baguio Council for the Protection of Children.
Agtultuloy metlaeng ti information campaign ken panagsanay nga isaysayangkatda mainaig iti Republic Act No. 7160 wenno ti Special Protection of Children Against Child Abuse, Exploitation and Discrimination Act kadagiti organisasyon dagiti agtutubo ken dadduma pay a sektor.
