Kumpiansa ti Department of the Interior and Local Government (DILG) a nalabo a mapasamak iti Pilipinas ti naranggas a tignay-protesta a napasamak idiay Nepal ken Indonesia kagiddan ti isyu ita mainaig iti korapsyon.
Sigun kenni DILG Secretary Jonvic Remulla, saan a kagagalad iti Pilipino a mangdadael wenno manguram iti pasdek iti katengngaan iti protesta.
Nupay kasta, impeksana a nakasagana dagitoy kaspangarigan a mapasamak ti kapada a tignay.
Mainaig iti dayta,imbilin ti nasao nga ahensya ti panakaipatungpal ti command conference mainaig iti daytoy tapno maisagana dagiti contingency plans kaspangarigan mapasamak ti dakkel a tignay-protesta.
Innayon ti nasao nga opisyal nga addaan iti maximum tolerance dagiti kameng iti pulisya ken mapalpalagipanda nga agtalinaed a kalmado ken raemen ti karbengan ken sentimento dagiti raliyista.
