BAGUIO CITY – Maan-anop ita ti suspek a nangpaltog iti pimmusay a nars ditoy Baguio City idi kalman.
Nabigbig ti biktima a ni Joanlee Japson Arca, 34-anyos, balasang ken residente ti Purok 2, Gabriela Silang, Baguio City.
Maibasar iti inisyal nga imbestigasyon ti pulisya, paruar ti biktima iti gate ti balay dagitoy idi killaat daytoy a pinaltogan ti saan pay a nabigbig a suspek.
Maibasar iti video footage a naala ti CCTV camera, nakamotorsiklo ti suspek a nakasuot ti nangisit a bull cap, yellow eyeglass protector, mapattapatta nga agtawen ti 45-50 ken agtayag iti 5’5 agingga 5’6 ken addaan medium-build a bagi.
Nagsagrap ti biktima iti dua a tama ti bala ti paltog.
Naitaray daytoy iti pagagasan ngem naideklara a dead on arrival.
Narekober met iti crime scene ti maysa a pidaso ti disassembled magazine, siyam a bala ken maysa a puraw nga envelope.
Im-imbestigaran ita ti pulisya ti motibo ken pakabigbigan ti suspek iti nasao a krimen.
