BAGUIO CITY – Naan-anayen a nabakunaan kontra COVID-19 ti nasurok 1,200 a kadete ken staff ti Philippine Military Academy (PMA).
Sigun kenni 1Lt. Christine Mae Calima, dadaulo ti Public Affairs Office ti PMA, katukad daytoy ti nasurok 50 a porsiento a populasion ti nasao nga akademya.
Innayona a natalged itan ti kasasaad dagiti nabakunaan a kadete ken awanan ti PMA iti aktibo a kaso ti nasao a virus.
Iti baet daytoy, kinunana nga agtultuloy latta ti panagwanawan ti akademya iti kasasaad ti salun-at dagiti amin a kadete.
Kinunana a nakasagana met latta dagiti quarantine ken isolation facilities ti PMA a pakatamingan dagiti kadete a makaptan iti COVID-19.
Maipalagip nga idi napalabas nga Enero iti agdama a tawen ket dimmanon iti 37 a kadete ken staff ti PMA ti nagpositibo iti COVID19.
Kabayatanna, impanamnama ni 1Lt Calima a posible a mailukat ti PMA para kadagiti bisita iti kabiitan a panawen.
Maipalagip a nairikep ti akademya kadagiti bisita sipud pay nangrugi ti pandemya para iti siguridad ti salun-at dagiti kadete ken personnel ti PMA.
