BAGUIO CITY – Dumanonen iti 500 a pilid ti nakolektar ti General Services Office (GSO) manipod iti nagduduma a barangay iti Baguio City.
Iti interview ti Bombo Radyo Baguio ken GSO head Eugene Buyucan, naala dagiti nasao a pilid manipod Barangay Loacan, Magsaysay, Sanitary Camp ken kaaduan ket sadiay Irisan a nakakolektaranda iti nasurok 300.
Sigun kenkuana, temporaryo a maiturung dagiti nakolektar a pilid iti sigud a basuraan sadiay Irisan Dump Site.
Kinunana a mabalinda nga ited iti Department of Social Welfare and Development (DSWD) dagiti pilid iti kanito nga agkiddawda tapnu maaramat kas flower pot, tugaw ken dadduma pay.
Mapunpuntirya metlaeng a maaramat dagitoy kadagiti landscapes.
Malaksid iti dayta, kinunana a kitaenda pay dagiti posibilidad a makaaramatan dagiti pilid a makolektar dagitoy tapnu saan a maurnong wenno matambak nga agserbi kas pagitlugan dagiti lamok a carrier ti denggue
Inlawlawagna a responsibilidad dagiti barangay a mang urnong kadagiti pilid ken urayenda laengen a maiyuman daytoy kadakuada tapnu dagitoy iti mangamong a mangisimpla ti schedule para iti special collection
Inpanamnamana nga agtultuloy iti panangkolektarda kadagiti nasao a kita ti basura kas tulong ti opisinada iti pannakapaksyat iti sakit a dengue iti syudad
Kagiddan iti dayta, immapela daytoy iti publiko para iti kooperasyonda ti pannakaidispose dagiti pilid.
Kinunana a nu kabaelan dagiti residente a mangiresiklo kadagiti pilid ket isu ti aramiden dagitoy tapnu matulunganda ti GSO para iti naparpartak a pannakadalus ti syudad kadagiti nasao a kita ti basura a mabalin a pagbalayan dagiti lamok.
