BAGUIO CITY– Naragsak nga inwaragawag ti Philippine Statistic Authority (PSA)-Cordillera a dumanon iti nasurok P10-B ti nagbalin a kontribusyon dagiti inbound tourist ken domestic tourist iti ekonomiya ti rehiyon Cordillera idi tawen 2019.
Sigun kenni Aldrin Federico Bahit Jr., Chief Statistical Specialist, agarup P8.7-B ti nabusbos dagiti domestic tourist bayat a P1.8-B met ti nagastos dagiti inbound tourist kabayatan ti panag-aliwaksay dagitoy.
Maibasar met iti Regional Tourism Satellite Account, nasurok 7,300 ti average expenditure dagiti foreign tourist ken Balikbayan bayat a nasurok 3,800 iti domestic tourist idi 2019.
Inlawlawagna a nabingay ti expenditure items dagiti turista manipud iti accomodation services, food and beverages, transportation services, travel agencies, shopping ken daduma pay.
Dinakamatna a nailista iti siudad ti kangatoan a bilang dagiti inbound ken domestic tourists manipud iti 75.3% sinaruno ti Mt. Province, Ifugao, Benguet a nakailista iti 3.9% ken maudi ti Kalinga nga addaan iti 3.8%.
