BAGUIO CITY – Pinarut ken inuram dagiti anti-illegal drug operatives ti Kalinga Police Provincial Office (PPO) ken PDEA-Cordillera ti nasurok P2.14-M a gatad dagiti pinuon ken bukel ti marijuana sadiay Tabuk City, Kalinga idi kalman.
Sigun kenni PCol. Davy Vicente Limmong, direktor ti Kalinga PPO, nadiskobre dagiti operatiba ti dua a pagmulaan ti marijuana sadiay Sitio Binongsay, Barangay Malin-awa nga addaan kalawa a 900 metro kwadrado.
Kinunana a sadiay a pinarut ken inuram dagiti operatiba ti 10,700 a pidaso dagiti fully-grown marijuana plants.
Inramanda metlaeng nga inuram ti nadiskobreda a 150 gramo ti bukel ti marijuana.
Nupay kasta, awan ti nakemmeg a marijuana cultivator kabayatan ti operasyon.
Dinakamat ni PCol. Limmong a ti balligi nga operasyon ket implementasyon ti nairtengan a kampanya kontra iti iligal a droga iti sidong ti OPLAN 14 November Uma a paset ti Barangay Drug Clearing Program ti PNP.
