BAGUIO CITY – Sumangsango iti kaso a panaglabsing iti Article 293 of RPC wenno robbery ti maysa a lalaki kalpasan a nagtakaw iti uneg ti maysa a pagtaengan sadiay Pico La Trinidad, Benguet itay nabiit.
Ti biktima ket maysa nga accountant, 39-anyos, tubo ti Bauko, Mt Province ken residente ti Pico, La Trinidad.
Maibasar iti imbestigasyon ti La Trinidad MPS, nagawid ti biktima sadiay Bauko, Mt Province idi Hulyo 21 nu sadino pinanawanna ti ballayna sadiay La Trinidad a naka-padlock.
Nupay kasta idi nagsubli daytoy idi Hulyo 27 ket ditoy a nadiskobre na a sumagmamano kadagiti materyales iti balay na ket mapukpukaw.
Karaman ditoy ti wallet a naglaon iti nagduduma a foreign currencies nga aggatad iti P106,688; nagduduma a credit cards ken ID’s; sumagmamano a cheque; dua a sun glasses nga aggatad iti P18,240; Police brand nga aggatad iti P9,120; maysa a bote ti arak nga aggatad iti P1,650 ken maysa a wine nga aggatad iti P300.
Gapu iti daytoy, pakabuklan a P280,998 ti natakaw iti uneg ti pagtaengan ti biktima.
Dagus met a nagturong ti biktima iti bangko iti nasao metlaeng nga aldaw tapno malapdan ti panaka-withdraw dagiti nakadeposito a kwarta iti dua a cheque ngem nasuspendir amin ti opisina gapu iti magnitude 7 a gingined.
Idi Hulyo 28, nagturong manen ti biktima iti bangko tapno ireport-na ti napasamak ngem ditoy a naduktalan na nairuaren wenno na-withdraw ti P150,000 a kwarta, alas nuebe ti agsapa iti nasao a metlaeng nga aldaw.
Maibasar iti report, nakastrek ti suspek iti balay ti biktima babaen iti panangkalay-at na (climb) iti fire exit rason a naserrek na ti third floor.
Agtultuloy ita ti imbestigasyon dagiti otoridad para iti panakatiliw ti suspek ken ti panakaipila ti kaskenan a kaso kontra kenkuana.
