Mapatta-patta a dumanon iti P450,000 a gatad ti fully grown marijuana plants ti nadiskobre dagiti kameng ti pulisia idiay Kalinga iti panangidaulo ti Pasil MPS kaduada ti PIU/DEU Kalinga ken Tinglayan MPS iti naipatungpal a marijuana eradication idiay Brgy Buscalan, Tinglayan, Kalinga idi laeng Setiembre 19 agingga 20, iti agdama a tawen.
Nagresulta ti operasion iti pannakadiskobre ti maysa a plantasion ti marijuana iti communal forest babaen ti panagregget dagiti otoridad, nu sadinno, mapatta-patta a ti kalawa daytoy ket dumanon iti 150 square meters a namulaan ti agarup 2,250 a pidaso ti fully grown marijuana plants.
Dagos a pinarot ken inuram dagiti operatiba ti nadiskobre a mula a marijuana iti nasao a lugar ken nangala dagitoy ti umno a “sample” tapno maisubmitir iti PFU-Kalinga para iti “qualitative test.”
Ti agtultuloy nga addang dagiti kameng ti pulisia ket kas panagsuporta iti agdama nga administrasion nga addaan panggep nga agbalin nga “illegal drug free” ti Pilipinas.
