BAGUIO CITY – Nakemmeg ti maysa a baro a drug personality sadiay Tabuk City bayat a nakalibas dagiti tallo a kakadwana kabayatan ti panag-pot session dagitoy iti maysa a balay sadiay sadiay Tabuk City, Kalinga idi kanikadua.
Nabigbig ti nasao a drug personality a ni Perfilio Gumabay Canceran, 31-anyos, baro ken residente ti Sta. Maria, Isabela.
Iti panakiyuman ti Bombo Radyo, kinuna ni Police Lieutenant Colonel Romulo Talay Jr., dadaulo ti Tabuk City Police Station a nakaawatda iti awag manipud kenni Nambaran Punong Barangay Jimmy Suwagon nga adda ti kinemmeg dagitoy nga agar-aramat iti iligal a droga.
Dagus a nagresponde dagiti personnel ti Drug Enforcement Unit ti pulisya para iti panakaikustodiya ken panakaiproseso ti nakemmeg nga indibidual ken dagiti nakumpiskar a drug paraphernalia ken iligal a droga.
Dinakamatna a nakalibas dagiti tallo a kakadwa ni Canceran idi nadlaw dagitoy ti presensia dagiti otoridad.
Nakumpiskar manipud iti balay ni Byron Maguddayao a nagserbi a drug den da Canceran dagiti drug paraphernalia, pakairamanan ti shabu residue bayat a nakumpiskar kenni Canceran ti maysa a pakete ti mapapati a shabu.
Naituding a makasuan dagiti nag-pot session iti panaglabsing iti RA 9165 wenno ti Comprehensive Dangerous Drugs Act of 2002.
Naituding a padawayan ti Tabuk City Police Station ti Barangay Anti-Drug Abuse Council (BADAC) ti Barangay Nambaran gapu iti kina-aktibo dagitoy iti agtultuloy a kampanya kontra iti iligal a droga iti siudad ti Tabuk sadiay probinsia ti Kalinga.
Kinuna ni Talay Jr. nga inton Lunes ket ipaayanda iti komendasyon ti BADAC ti Barangay Nambaran gapu iti balligi a panangisayangkat dagitoy iti mandatoda kas katulongan ti pulisya ken kas force multipliers iti kampanya kontra iti iligal a droga.
Kinunana nga aktibo dagiti barangay officials ti Nambaran iti panangipatungpal dagitoy iti anti-criminality campaign gaputa mismo a dagitoy ti mangkemkemmeg dagiti karaman iti iligal nga aktibidad ken ayabanda laengen dagiti pulis para iti sumaruno a proseso ken dokumentasyon.
Dinakamatna a ti panangipaayda iti komendasyon ket paset ti panangparegtada pay iti moral dagiti barangay officials ken dagiti umili nga aktibo a makipaspasat kadagiti program ti pulisya kontra iti iligal a droga ken dadduma pay a kita ti kriminalidad.
