Impaganetget ti Department of Education nga iti umadanin a moving up ceremonies wenno graduation ket saan a mandatoryo a maipatungpal dagiti non-academic projects bayat a boluntaryo ti panagdonar gapu iti “No Collection Policy.”
Iti panakiuman ti Bombo Radyo kenni Manilyn Botilas, Officer-in-charge (OIC) Information Officer ti Department of Education (DEpEd)-Cordillera, impeksana ti “No Collection Policy” no sadino rumbeng nga awan ti maipatungpal a koleksyon kadagiti estudyante kasta met kadagiti nagannak dagitoy, saan met a nasken a mangipaay ti proyekto dagitoy wenno ti batch project.
No pay kasta, mabalin ti agdonar ngem daytoy ket boluntaryo.
Sigun kenni Botilas, iti panagleppas ti School year 2023-2024, nasaysayaat no daytoy ket marambakan kas simple ken meaningful tapno saan a madagsanen dagiti nagannak nangruna ket ti kangrunaan nga objective daytoy ket ti makaadal ken makaturpos dagiti estudyante.
Iti agdama, makumikom dagitoy iti maika-uppat a kwarter nangruna ket naituding nga inton Mayo baente nuebe agingga Mayo trenta’y uno dagiti graduation wenno moving up ceremonies kadagiti nagduduma a pagadalan iti pagilian.
Para ita nga school year, addaan daytoy ti tema a “Kabataang Pilipino Para sa Matatag na Kinabukasan ng Bagong Pilipinas.”
Kabayatanna, nakaskediul nga inton Hulyo baente dos angingga baente syete ti brigada eskwela kasta met iti enrollment.
Impakaamo pay ni Botilas a ti panagrugi ti klase para iti School year 2024-2025 ken inton Hulyo baente nuebe bayat a manamnama nga agleppas daytoy inton Mayo dise sais, dos miel baente singko.//M
