BAGUIO CITY – Naklaat ti Department of Agriculture-Cordillera seknan ti panangipaulog ti lokal a gobyerno ti La Union iti “No Negative Result No pass policy” kadagiti mannalon a mangibiyahe kadagiti produktoda a nateng sadiay Metro Manila.
Iti panakiuman ti Bombo Radyo Baguio, inaklon ni OIC-Regional Technical Director Danilo Daguio a nasdaawda idi kalman kalpasan a naiyuman iti opisinada ti nasao a polisiya nu sadinno addu a mannalon ti saan a napastrek iti border checkpoint ti La Union.
Gapu iti daytoy, patienna a nadadael dagiti nateng a kinarga dagiti biyahero idi kalman gaputa pinara ken nilapeddan dagiti otoridad nga agwanwanawan iti nasao a probinsiya.
Dinakamatna a karaman a naapektaran ti maysa a biyahero a mangipatulod ti nateng iti Philippine Airlines a maiturong koma sadiay Cebu ngem napaay daytoy gaputa saan a napastrek iti border checkpoint.
Inlawlawagna nga ita laeng nga impaulog ti lokal a gobyerno ti La Union ti “No Negative Result No Entry” gaputa saan a naimplementar daytoy sipud nangrugi ti pandemya.
Immuna metten nga inwaragawag ti nasyonal a gobyerno a saan a rumbeng a maitantan ti panakaibiyahe ken panakailako dagiti food items kas ti nateng tapnu saan a madadael dagitoy.
Mainaig iti daytoy, impettengna pay a nakikoordinardan iti Provincial Inter-agency Task Force ti La Union tapnu maamoan ti rason ti panangipaulogda iti nasao a polisiya ken tapnu maimpormaranda a nasapsapa dagiti mannalon seknan iti nagduduma a pagalagadan nga ipaulog ti nasao a probinsiya.
ni Department of Agriculture OIC-Regional Technical Director Danilo Daguio
