Tagtagiragsaken ti maysa nga Overseas Filipino Workers a mangisuro kadagiti ubbing nangruna kadagiti Kindergarten pupils idiay Thailand.
Iti interview ti Bombo Radyo Baguio kenni Jerson E. Chillag, manursuro idiay Thailand, kinunana a saan a nadagsen ti trabaho ken saan unay ti “paperworks” nga ar-aramidenda sadiay.
Kadawyan a sumsumrek ti pagadalan ni Chillag manipod Lunes agingga Biyernes bayat a ti Sabado ken Domingo ket aldaw ti panaginana daytoy.
Iti tallo a tawen a panangisurona, naobserbarna a nadisiplina dagiti ubbing kasta met dagiti natataengan gaputa sursurutenda latta ti tradision ken ti wagas a panagrespeto dagitoy.
Bayat ti panangisuro ni Chillag, ti maar-aramat a lengguahe ket English numan pay kabaelanna ti agsao ti lengguahe dagiti Thais.
Ti agbalbalin nga inpirasionna iti biag ket ti pamiliana para iti masakbayan dagitoy ken ti bukod metlaeng a masakbayanna.
Sigun kenkuana, pinilana ti nasao a pagilian gaputa saan unay a nangina ti “cost of living” wenno dagiti gagatangen.
Aklonen ni Chillag nga awan panggepna a pumanaw wenno umakar iti nasao a pagilian ngem silulukat daytoy para iti dadduma pay nga oportunidad.
Kabayatanna, imbinglay ni Chillag a saanna a mapaspasaran ti diskriminasion gaputa kaykayatda dagiti Pilipino sadiay.
