BAGUIO CITY – Naituding nga agawid ditoy Pilipinas ti maysa a Overseas Filipino Worker (OFW) manipod sadiay Kuwait a biktima ti panagmaltrato.
Naamuan nga addan ti OFW a ni Richelle Tullas Ardaniel manipud Lagayan, Abra iti embahada ti pagilian sadiay Kuwait ken ur-urayenna laengen ti panakaiproseso dagiti dokumento para iti panagawid daytoy.
Impanamnama met ni Ma. Kristina Doming ti Family Welfare Officer ti Overseas Workers Welfare Administration-Abra nga agtultuloy a makipatpatangda kenni Ardaniel agingga a makaawid daytoy ditoy pagilian.
Maipalagip a nag-viral iti social media ti maatap a panangmaltrato dagiti amo ni Richelle kenkuana sadiay Kuwait.
Maibasar iti nasao a pablaak, dandangran dagiti amona daytoy babaen iti panagbarsakda kenkuana iti sapatos ken dadduma pay a klase ti panagabuso.
Nupay kasta, saan nga dagos nga inaksyunan ti agency daytoy ti nasao a parikot isut gapuna a naipabalaak daytoy iti social media agingga a naiyuman kadagiti otoridad.
