BAGUIO CITY – Kumpirmado a nagpositibo iti coronavirus disease (COVID)-19 ti maysa nga OFW manipud sadiay Barangay Catacdegan Nuevo, Manabo, Abra.
Iti eksklusibo nga interbyu ti Bombo Radyo-Baguio ken ni Abra Gov. Maria Jocelyn Bernos, kinunana a ti pasiente ket maysa a seaman manipud UAE ken nagawid daytoy sadiay Manabo, Abra idi Marso 8.
Kalpasanna ket nagturong daytoy sadiay Sinapangan, Bangued para iti Grand Parade idi Marso 9.
Kasaruno iti daytoy ket nagturong ti nasao nga indibidual sadiay Lorma Hospital, San Fernando, La Union idi Marso 10 ken apanna sinarungkaran ti inana a matamtaming iti pagagasan.
Ditoy a naipasidong iti check-up ti nasao a seaman gapu iti nakaro a gurigor daytoy ken naikonsidera kas Person Under Investigation (PUI) ken nabalakadan a maipasidong iti self-quarantine.
Nupay kasta, nagsubli daytoy sadiay Abra idi Marso 13 partikular sadiay Barangay Nagulian, ken Subusub iti ili ti Sallapadan sakbay a timmabuno iti maysa a lamay sadiay Tumalip, Licuan-Baay.
Maibasar iti damag, saan nga inpakaammo ti nasao a seaman a naikonsidera daytoy kas PUI isut gapuna a saan daytoy a naimonitor.
Nupay kasta, nakaawat iti awag ti Department of Health-Cordillera manipud iti Lorma Hospital maipapan iti resulta ti test ti nasao a seaman ken nakumpirmar a nagpositibo daytoy iti COVID-19.
Sigun ken ni Bernos, naiturong ti nasao nga OFW iti Level 2 Hospital ngem gapu ta saan unay a nakaro ti sakit daytoy ket nabalakadan a maipasidong iti home-quarantine.
Kinunana a nakalockdown ita ti pagtaengan ti nasao nga OFW ken maipaspasidong iti nainget a contact tracing dagiti nakapulapolna.
