Indeklara ni President Ferdinand “Bongbong” Marcos Jr. ti Oktubre 30 tunggal tawen kas “National Day of Charity” babaen ti Proclamation No. 598.
Sigun iti Malakanyang, panggep ti “National Day of Charity” a maawatan ti tunggal indibidual ti kinapateg ti pannakipagrikna, panagkaykaysa ken social responsibility kadagiti Pilipino.
Ti pannakaideklara ket kas maitunos metlaeng iti Section 9, Article II of the Constitution a mangimandato a mangitandudo ti nalinteg ken naurnos a kagimongan tapno maipasigurado ti kinarang-ay ken panagwaywayas ti pagilian, ken kasta met a mawayawayaan dagiti umili manipod iti kinapanglaw.
Gapu iti dayta, nadutukan ti Philippine Charity Sweepstakes Office (PCSO) a mangidaulo, makikoordinar ken mangimaton iti panagrambak ti “National Day of Charity.”
Malaksid iti dayta, daytoy ti mangbukel ti programa, aktibidad ken proyekto para iti panagrambak ti “National Day of Charity.”
Amin nga ahensia ti gobierno pakairamanan ti korporasio, “financial institutions”, kolehiyo ken unibersidad ket naibilin a makipaset ken makipartisipar iti panagrambak ti “National Day of Charity.”
