Pinaneknekan manen ni Joshua “The Passion” Pacio ti kabaelanna ken kinapigsana iti uneg ti ring iti Lusail Sports Arena idiay Doha, Qatar.
Daytoy ket kalpasan nga inabakna ni Jarred “The Monkey God” Brooks iti maikadua a rikus ti labanda babaen iti technical knockout.
Gapu iti daytoy, agtalinaed ken iyawid ni yCordilleran Mixed Martial Arts fighter Pacio ti ONE MMA Strawweight title.
Pinagyaman met ni Pacio dagiti amin a timmulong kenkuana pakairamanan ti team daytoy a Lions Nation Mixed Martial Arts, dagiti prayer warriors daytoy iti Pilipinas,ti pamiliana, simbaan, ken kasta metten dagiti amin a Pilipino nga adda iti pagilian ken dagiti adda sadiay Qatar.
Maipalagip a daytoy ti maikatlo a laban dagiti dua para iti ONE Strawweight MMA World Title.
Iti dua nga immuna a laban dagitoy, saggaysa ti pangabakda.
Kabayatanna, napaay met ni Kevin “The Silencer” Belingon kontra kenni Bibiano “The Flash” Fernandes.
Daytoyen ti maikatlo a pangabak ni Fernandes bayat nga agtaltalinaed a maysa kenni Belingon.
Maipalagip a ti maysa a laban dagitoy ket nagleppas iti kontrobersial a disqualificatiojn nga isu ti ad-adda a nangpapudot iti kompetision.
