BAGUIO CITY- Posible a maksayan ti pammastrekkan dagiti parapubliko a transportasyon nu maisubli ti operasyon ti HOHO tourist bus iti Baguio City.
Iti interview ti Bombo Radyo Baguio, binigbig ni Pat Evangelista, dadaulo ti Liga ng Transportasyon at Operators ng Pilipinas (LTOP)-Cordillera ken Region 1, ti napintas a panggep ti lokal a gobyerno a pannakaisubli ti HOHO bus gaputa malaksid a makalibre dagiti turista ket maksayan pay ti nailet a gunay ti trapiko iti siyudad.
Nupay kasta, impeksa ni Evangelista a maksayan met ti pasahero a mailugan dagiti transport sektor nangruna dagiti agbibiyahe iti truta ti Pacdal-Mines View.
Gapu iti daytoy, iyap-apela ti nasao nga opisyal iti lokal a gobyerno a mangipatungpalda koma ti konsultasyon kadagiti transport group tapno maadal a nalaing sakbay a maipatungpal inton Hulyo 15.
Kiniddaw pay ni Evangelista a dagitoy laengen ti maipaayan iti akreditasyon nga agbiyahe wenno ag-operate iti nasao a programa ti gobyerno.
