![](https://img.bomboradyo.com/baguio/2020/12/UV-Express.jpg)
BAGUIO CITY – Dismayado dagiti drivers ken operators ti Cordillera UV Van Express iti saan paylaeng a panakaipalubos ti inter-regional a panagbiyahe dagitoy.
Ipeksa ni Rey Bacoco ti United Metro Baguio Transport Federation ken Cordillera UV Express Van Federation iti interview ti Bombo Radyo Baguio a nabayagen a kidkiddawenda ti nasao a banag ngem agingga ita ket saan paylaeng a naaksionan.
Naobserbaranda a gapu iti daytoy ket nagraira ita dagiti colorum a lugan nga agbibiyahe iti ruar ti siudad partikular iti ruta dagitoy a San Fernando, Pangasinan ken iti nagduduma a paset ti rehion.
Inaklona a marigatan ita dagiti drivers ken operators dagiti van kalpasan ti panakapukawda iti pagsapulan manipud nangrugi ti pandemya.
Kinuna pay nga isuda laeng ti saanpay a nagsubli iti operasion manipud kadagiti kakadwada a grupo nga in-inot a bumangbangon iti laksid ti agtultuloy a pandemya.