Dumanon iti 1,482,076 registered voter ti nailista iti rehion Cordillera agingga idi Abril 20, kas maibasar iti datos iti Commission on Elections kalpasan a naaprobaran iti Election Registration Board (ERB) ti listaan dagiti botante.
Sigun kenni Atty. Julius Torres, regional director iti Comelec-Cordillera, karaman ditoy ti 1,093,162 botante para iti barangay elections ken 388,914 para iti Sangguniang Kabataan (SK).
Dumanon met iti 25,356 nga application ti maipasidong iti panagaprobar inton Hunio 1 kalpasan ti maudi nga aldaw iti panagrehistro idi Mayo 18.
Sigun kenni Torres, nangisayangkatda iti satellite registration kadagiti pagadalan, barangay, ken komunidad dagiti election officer manipod iti nangrugi ti registration idi Oktubre idi napalabas a tawen tapno maiyasideg daytoy iti publiko. Nupay kasta, nagbalin a karit ti panagumay iti aplikante iti maudi nga aldaw iti voter’s registration, nangruna iti siudad ti Baguio ken Tabuk City idiay Kalinga.
Inlawlawag metlaeng ni Torres a saan nga otomatiko nga aprubado dagiti application a naawat iti maudi nga aldaw gaputa dumalan pay dagitoy iti panagdengngeg iti ERB inton Hunio 1.
Ti panangipila iti certificate of candidacy para iti BSKE ket naituding manipod Setiembre 28 agingga iti Oktubre 5, bayat a maipatungpal ti eleksion inton Nobiembre 2.
