Nasuspende ti pito nga opisiales ti Bureau of Corrections iti New Bilibid Prison Reservation idiay Muntinlupa bayat a maimimbestigaran ti reklamo maipapan iti maipagarup a dehumanizing a body search, kadagiti bisita dagiti political prisoners.
Kasaruno daytoy iti reklamo dagiti sumagmamano a babbae iti Commision on Human Rights, kalpasan a nagsagabada ti nalabes a body search idi sinarungkaranda dagiti kakabagianda ken assawada iti pagbaludan.
Sigun iti maysa a babae a nagbisita iti kabsatna a political prisoner, napaikkat ti badona ken sinukimatda dagiti pribado a paset ti bagi daytoy.
Gapu iti dayta, imbilin ti Department of Justice a maimbestigaran ti nasao a reklamo.
Nupay kasta, inlawlawag ti Bureu of Corrections a inrugi dagitoy nga impatungpal ti nailet a Body Search idi Disiembre 2023, kalpasan a nakakompiskar dagitoy ti kontrabando manipud kadagiti prebado a paset ti bagi dagiti bisita iti pagbaludan.
