Manamnama a maideklara ti opisina iti Bureau of Fire Protection(BFP), ken ti National Police Commission-Department of the Interior and Local Government (NAPOLCOM-DILG) a drug-free babaen iti maipatpatungpal a Drug-Free Workplace Program.
Iti panakiuman ti Bombo Radyo kenni Rosel Sarmiento, Regional Information Officer iti Philippine Drug Enforcement Agency-Cordillera, agtultuloy iti panangipatungpalda iti nasao a programa kadagiti nagduduma nga opisina pakairamanan dagiti law enforcement agencies, ken dagiti government wenno civilian offices.
Kagiddan dayta,maguyguyugoy dagiti Local Government Units a rugyandan nga iduloan ti drug testing nangruna ta umadanin ti eleksyon.
Inlawlawag ni Sarmiento a nupay awan ti nadakamat iti election code a masapol a maipasidong iti drug test dagiti agngayangay, kinunana a dakkel a tulong a masigurado a ti maysa a kandidato ket awan ti pakainaiganna iti panagaramat iti iligal a droga iti pananggun-od iti talek ti publiko.
Iti sabali a bangir,inlawlawag ni Sarmiento ti nagdumaan ti proseso iti implementasyon iti Drug Free Workplace Program kadagiti law enforcement agencies, ken dagiti government wenno civilian offices.
Sigun kenni Sarmiento, nu ti personnel iti civilian office ket nagpositibo iti drug test, kasapulan a maipasidong iti confirmatory test sakbay a maipasidong iti rehabilitasyon.
Bayat a nu nagpositibo ti personnel iti maysa a law enforcement agency iti drug test, saanen a masigurado nu makasubli pay daytoy iti serbisyo ngem mabalin latta a mairefer para iti rehabilitasyon.//Bombo Rob Dominguez
