BAGUIO CITY – Mangnamnama ti provincial government ti Abra nga iti kabiitan a panawen ket mailukat ti probinsia para kadagiti turista nga agtaud iti dadduma a probinsia ken rehion.
Kasaruno daytoy ti panakaileppas ti Tarlac, Pangasinan, La Union Expressway a nangpa-ababa iti oras iti panagbiahe paturong sadiay Abra nga ita ket dumanon laengen iti lima agingga innem nga oras manipud iti sigud a walo nga oras a biyahe.
Sigun iti gobernador ti Abra, dakkel a tulong daytoy tapnu nalaklaka a madanun ita ti probinsiada nangruna kadagiti kayatna ti mapadasan dagiti extreme adventures sadiay.
Nupay saan paylaeng nga inlukat ti Abra ti ruangan daytoy kadagiti turista, dinakamatna a naipalubos metten ti panagsarungkar dagiti residente ti probinsia kadagiti tourist attractions sadiay.
Impeksa ti gobernador ti posibilidad iti panaglukat ti turismo ti Abra kadadagiti turista manipud iti ruar ti probinsia kalpasan ti panakaisagana dagiti tourist spots sadiay.
Impannakkelna nga adu ti mabalin a pagpasyaran sadiay Abra nangruna kadagiti naissem ti extreme adventure kas kadagiti waterfalls, camping sites, caves, hiking ken trekking trails a masarakan iti nagduduma a munisipyo sadiay.
