BAGUIO CITY – Naideklara ti outbreak ti African Swine Fever (ASF) kadagiti munisipyo ti Malibcong, Daguioman ken Tineg sadiay probinsia ti Abra.
Nailanad iti Executive Order AP-03, series of 2021 a pinirmaan ni Governor Joy Bernos a gapu daytoy iti panagpositibo iti ASF dagiti samples manipud kadagiti taraken a baboy sadiay Barangay Lat-ey ken Barangay Pacgued iti munisipyo ti Malibcong ken sadiay Barangay Cogon iti munisipyo ti Tineg idi napalabas nga April 16, 2021.
Nagpositibo met iti ASF ti maysa a sample manipud iti baboy-ramo a nagtaud sadiay Barangay Tui iti munisipyo ti Dagiuoman.
Immunan a nadiskobre ti panagpositibo iti ASF dagiti baboy-ramo manipud kadagiti samples a naala kadagiti baboy-ramo a natiliw iti Comia-as Forest sadiay Malibcong idi March 20, 2021.
Nailanad pay iti Executive Order ti panakaisayangkat dagiti quarantine measures kas iti mass depopulation kadagiti taraken a baboy nga adda iti uneg ti 500 meter radius kadagiti naapektaran a lugar.
Gapu iti daytoy, nangrugin ti panag-survey kadagiti taraken a baboy a maipasidong iti swine depopulation tapnu maliklikan ti ad-adda a panagwaras ti ASF sadiay Abra.
Iyap-apela pay ti provincial government ti Abra ti dagus a panangireport dagiti hog raisers iti panakatay dagiti tarakenda a baboy.
