Naaprobaranen iti City Council ti umuna a pannakaibasa ti singasing nga ordinansa a mangipaay ti financial assistance a P10,000 iti amin a Sanguniang Barangay member iti lokal a gobierno iti siudad ti Baguio.
Daytoy ket kas panangagipaay iti pammateg iti naaramidanda ken agtultuloy a serbisio dagitoy iti tallo nga agsasaruno a termino dagitoy.
Iti sidong ti maisingsingasing nga ordinansa nga insurat ni Baguio City Councilor Leandro B. Yangot, Jr., panggep ti pinansial a tulong a mabigbig dagiti opisiales ti barangay ken maipaayan ti kaskenan a tulong kas panagapresyar.
Nakalanad iti ordinansa a tunggal Sangguniang barangay members a nagserbi iti tallo a tawen a termino ket rumbeng a makaawat ti pammabigbig.
Ti pondo a mausar para iti pinansial a tulong ket naimandato iti sidong ti naisingasing nga ordinansa ket rumbeng nga agtaud manipod iti general fund ti siudad babaen ti City Budget Office.
Nailawlawag nga adda dagiti Sanguniang Barangay member a nangidedikar ti bagida nga agserbi iti masakupanda a barangay a rason ti panagdur-as ken progreso iti siudad ti Baguio.
Kabayatanna, nakalanad iti RA 6713 wenno Code of Ethical Standards for Public Officials and Employees ti pannakabigbig ti kinapateg ti insentibo ken “rewards” tapno ad-adda a matignay ken maparegta dagiti agserserbi iti publiko.
Nupay kasta, adu dagiti nagkomento a saan a rumbeng a maipaay daytoy nga insentibo agsipudta desisyon ken pinilida nga agserbi iti publiko.
