Mangipaay ti Philippine Amusement and Gaming Corporation (PAGCOR) iti P20 million kenni Filipino gymnast Carlos Yulo kas reward iti pannangabakna iti dua a gold medals iti floor ken vault events iti men’s artistic gymnastics ti Paris Olympics 2024.
Sigun kenni PAGCOR chief Al Tengco, mandato ti opisinada a mangipaay iti P10 million kadagiti atleta a mangabak iti balitok a medalya kas nakalanad iti linteg.
Dinakamat ni Tengco a makaawat metlaeng iti sag-P5 million nga insentibo ti coach ken personal trainer ni Yulo.
Gapu ta dua a medalya ti napangabakan ni Yulo, makaawat ti coach ken trainer daytoy iti sag-P10 million.
Malaksid iti P20 million nga ipaay ti PAGCOR, makaawat pay ni Yulo iti kanayonan nga insentibo kas iti 3-bedroom unit manipud iti Megaworld, P6 million manipud iti House of Representatives ken dadduma pay.
Kabayatanna, maipaayan iti P5 million dagiti atleta a makaiyawid iti Olympic silver medal ken sag-P2.5 million iti coach ken trainer.
Maipaayan met iti P2 million dagiti atleta a makaiyawid iti bronze medal ken sag-P1 million iti coach ken trainer.
