BAGUIO CITY – Dinadael ti nagtipon a pwersa ti nagduduma nga yunit ti Kalinga Police Provincial Office ken ti PDEA ti nasurok P200-K a gatad dagiti pinuon ti marijuana sadiay Butbut Proper, Tinglayan, Kalinga idi kanikadua.
Pinarut ken inuram dagiti operatiba ti sangaribo a pinuon ti dadakkel a marijuana manipud iti pagmulaan nga addaan kalawa a 100 metro kwadrado.
Naisayangkat ti operasyon iti sidong ti Oplan Uno Berde a paset ti nairtengan a kampanya kontra iti iligal a droga tapnu madalusan amin nga illegal drug-affected barangays ti Kalinga, partikular sadiay munisipyo ti Tinglayan.
Sigun kenni PCol. Davy Vicente Limmong, dadaulo ti Kalinga Police, bumasbassiten ti suplay ti marijuan sadiay Kalinga gapu iti agtultuloy ken serye ti eradication operations nga isaysayangkat dagiti otoridad.
