BAGUIO CITY – Maragsakan dagiti drivers ken operators iti taxi kasaruno ti panakaaprobar ti P50 a flagdown rate.
Iti panakiuman ti Bombo Radyo kenni Romeo Vicente, maysa a taxi driver iti siudad ti Baguio, umdasen ti singkwenta a piso tapno makabawi dagitoy iti pamastrekanda iti tunggal aldaw laketdi saan a ngumato ti presyo ti krudo wenno ti produkto a petrolyo.
Sigun kenni Vicente, dakkel ti epekto ti nasao a banag kadagiti konsyumer rason a nu daduma, kaykayat latta dagitoyen ti aglugan kadagiti jeep.
Nupay kasta, kinuna ni Vicente a mabalin nga in-inot a mapakaammoan dagiti umili seknan iti panakasingir ti baro a flagdown rate laketdi aramiden ti Land Transportation Office ken ti Land Transportation Franchising and Regulatory Board dagiti rumbeng nga aramiden dagitoy seknan iti umno a proseso iti panakaipatungpal daytoy kas iti panangcalibrate kadagiti metro tapno maliklikan ti saan a panagkinnaawatan iti nagbaetan dagiti drivers ken dagiti pasaheros.
JAY NGAROD UMNO A PROSESO, KASLA DAYTAY NAPALPALABAS, 35 PLUS 5, NAGBAYAG NGA PANAWEN NGA AGPLA-PLUS 5 DAGITI TAXI DRIVER NGEM HAAN A NAUP-UPGRADE JAY METRO ISUNGA DAYJAY KET PUON ITI SAAN A PANAGKIKINNAAWATAN DAGITI DRIVER KEN DAGITOY PASAHEROS TAYO.
Innayon ni Vicente nga awan pay ti impakaammo kadakuada dagiti maseknan nga opisina maipapan iti panagcalibrate dagitoy kadagiti metrosda iti baet ti sayanggusing nga manarimaanen daytoy.
Iti agdama, saan pay mabalin nga agipangato dagiti driver iti pamasahe gapu ta awan pay ti naipaiyulog a pammilin seknan iti calibration.//Bombo Rob Dominguez
