Prayoridad ita dagiti mammanday-linteg ti singasing a P6.2 trilyon a national budget para iti tawen 2025.
Daytoy ket sigun kenni House Speaker Martin Romualdez.
Kasaruno ti panaprobar dagiti “priority bills” ni President Ferdinand “Bongbong” Marcos Jr.
Kinuna ni Martin a ti kapapatgan iti tunggal tawen a maipaspasa ket ti “national spending program”.
Dinakamatna pay nga agtultuloy a suportaanda ti programa ti gobierno a Panghanapbuhay para sa ating Disadvantaged at Displaced Workers (TUPAD) iti sidong paylaeng ti Department of Labor and Employment.
Impakaamo pay ni Romualdez a ti Kongreso ken Senado ket asidegen iti katulagan maipapan iti pannakaamyendar ti Rice Tariffication Law (RTL) kasaruno ti panakitaripnongna kenni Senate President Francis Escudero.
Sigun kenni Romualdez, ti panagregget pakairamanan ti singasing a pannakabalbaliw ti Rice Tariffication Law ket paset ti panagkomit tapno masuportaran ti sirmata ni Marcos Jr. a mangpabiag manen iti sektor ti agrikultura ken mangitag-ay iti biag dagiti mannalon a Pilipino.
Panggep ti pannakaamyendar a maipasigurado ti seguridad ti makan ken nasayaat nga ekonomiya para kadagiti mannalon babaen ti panangipaay ti nalaka ken “quality rice” kadagiti Pilipino ken panangpaadu iti matgedan dagiti mannalon.
