![](https://img.bomboradyo.com/baguio/2021/09/baguio-tourism-workers-vaccination-3.jpg)
BAGUIO CITY – Isagsaganan ti lokal a gobyerno ti Baguio dagiti pagalagadan iti panakaiyuswat ti panagaramat ti COVID-19 at-home antigen self-test kits ditoy siudad.
Sigun kenni Mayor Benjamin Magalong, paset daytoy ti addang ti siudad tapnu mapapartak ti panagduktal ken panangimaton kadagiti kaso ti COVID-19 kasaruno ti manamnama a panagadu pay ti kaso ti nasao a sakit gapu iti Omicron variant.
Dinakamatna a tallo a a barangay iti siudad ti napili a pakaisayangkatan ti pilot testing para iti daytoy.
Kinunana a dagiti laeng maipaayan ti self tests kits ket dagiti addaan iti sintomas tapnu maliklikan iti saan nga umno a pannakaaramat dagitoy.
Dinakamatna nga adda dagiti disadvantage daytoy kas iti false negative result ngem impettengna nga adu dagiti pagsayaatan daytoy kas iti pannakapapartak ti pannakaduktal ken pannakamanehar ti COVID19 case ditoy syudad.
Mainaig iti dayta, kinunana a naituding a mangiruwar dagitoy iti video tutorial nu kasano a maaramat ti self tests.
Innayunna a gatangen ti lokal a gobierno dagiti kits iti 250 pesos ken mailako dagitoy iti kapada a presyo.
Kinunana pay a manamnama nga iwaragawagda dagiti lugar a makaimuntaran dagiti stalls a makailakuan dagiti kits iti kanito a maripaso dagitoy dagiti pagalagadan iti pannakaaramat dagiti self tests kits.