BAGUIO CITY – Impaulog ti lokal a gobyerno ti Baguio ti pagalagadan iti panagturong iti Baguio Public Cemetery para iti panaka-obserbar ti All Souls Day.
Nailanad iti Executive Order No. 124, Series of 2021 ti aldaw a mabalin a pagsarungkaran dagiti immediate family members iti minatay dagitoy, no sadino, ti schedule ti panagbisita ket naituding iti tunggal distrito ti Baguio.
Nainget a maipatungpal ti health protocols kas iti panagsuot ti facemask ken face shield ken panagtungpal iti physical distancing.
Maikalkalikagum ti panag-fill-up dagiti maseknan iti health declaration forms ken maalaan ti temperatura sakbayda a mapalubusan a sumrek iti kamposanto.
Nupay kasta, saan a mapalubusan a makastrek dagiti indibidual a makitaan kadagiti sintomas.
Masurot metlaeng ti agdama a pagalagadan ti IATF kas iti limitasyon iti tawen dagiti mabalin a rumwar.
Agtalinaed a maiparit dagiti arak, panagsugal, panagpatukar ti napipigsa a musika ken panagilako iti uneg ti kamposanto.
Naibilin met ti nainget a panangwanawan dagiti security personnel kadagiti kalkalsada a paturong iti nasao a kamposanto.
