Impakaamo ti Taiwan nga inserradan ti imbestigasion seknan kadagiti “pagers” a bimtak idiay Lebanon idi Setiembre a rason ti pannakatay ti sumagmamano nga Hezbollah a mangsupsuporta ti Iran.
Immuna a kinuna dagiti otoridad a dagiti “pagers” ket nasuratan ti nagan a Taiwan-based Gold Apollo, maysa a kompania a nangibaga a saanda nga inaramid dagitoy.
Ngem kinuna met ti gobierno ti Taiwan a saan a naaramid idiay Taiwan dagiti pagers.
Iti panangilawlawag dagiti prosecutor ti Taipei a mangim-imbestigar iti nasao a kaso, kinunada a ti modelo ti pager nga AR-924 a bimtak idiay Lebanon ket pinartuat, nailako, ken naipatulod ti maysa a kompania a maawagan iti Frontier Group Entity, ken naaramid iti ruar ti Taiwan.
Nupay kasta, kinunada a naotorisaan ti Gold Apollo ti kompania a mangusar iti Apollo trademark, isut rason a mapapati a kukua ti Taiwan dagiti “pagers.”
