KERALA, INDIA – Inwaragawag ti pagilian nga India nga addan ti kaso dagitoy iti clade 1b varity ti Mpox wenno Monkeypox, maysa a kapartakan a maiyakar a klase ti nasao a sakit.
Maibasar iti datos, daytoy ti kaunaan a kaso ti clade 1b iti South Asia.
Sigun iti Health Ministry Spokersperson Manisha Verma, ti nasao a kaso ket manipud sadiay Malappuram distrito ti Kerala.
Ti patiente ket agtawen iti 38-anyos a lalaki nga addaan iti travel history sadiay United Arab Emirates.
Iti agdama, agtultuloy ti monitoring dagiti maseknan nga otoridad kadagiti nakipulapol kenkuana pakairamanan dagiti dua pulo ket siam a gagayyem, pamilia ti nasao a pasiente ken dagiti tallo pulo ket pito a pasahero ti eroplano a nagluganan daytoy.
Maipalagip nga immuna a nagraira ti mpox sadiay Democratic Republic iti Congo ita a tawen, sabakbay a nagwaras daytoy kadagiti kabangibangda a lugar ken pagilian.
Iti agdama, mabambantayan ti dua a klase ti mpox a Clade 1 ken Clade 1b nga agwar-waras sadiay Congo.
Ti mpox wenno monkeypox ket maiyakar babaen iti close physical contact, pakairamanan ti sexual contact kadagiti naapektaran nga indibidual ken dadduma pay.
Nupay kasta, saan daytoy a kas iti COVID-19 a nalaka nga agwaras babaen Iti angin.
