![](https://img.bomboradyo.com/baguio/2021/08/Joel-Toralde-Mangisel.jpg)
BAGUIO CITY – Im-imbestigaran paylaeng dagiti otoridad ti pakabigbigan dagiti tallo a suspek a nangbagbagsol iti maysa a taxi driver ken nangtakaw iti koleksion daytoy sadiay P. Burgos Street ditoy siudad ti Baguio iti pasado alas dose idi parbangon.
Nabigbig ti biktima a ni Joel Toralde Mangisel, 40-anyos, tubo ti Manila ken residente ti Irisan, Baguio City.
Maibasar iti salaysay ti biktima, naglugan iti taxi nga imanmanehona dagiti suspek a dua a lalaki ken maysa a babai iti deppaar ti Lower Magsaysay ken nagpatulod dagitoy sadiay Harrison Road.
Nupay kasta, idi nakasangpetda sadiay ket saan a bimmaba dagiti suspek ken nagpatulodda manen sadiay Mabini Street ken idi nakadtengda sadiay ket imbilinda manen nga agsublida sadiay Lower Magsaysay.
Ditoy a kiniddaw dagiti suspek nga iserrek ti driver iti P. Burgos Street ti taxi tapnu mapanda iti ikit ti maysa kadagiti suspek.
Ipapaigid ti biktima ti taxi idi binagbagsol daytoy ti maysa kadagiti lalaki a suspek isut gapuna a sinarapa dagiti bagsol a nangitunda tapnu madunor dagiti imana ken maidungpar ti taxi iti maysa a poste ti kuryente.
Naduktalan nga inala dagiti suspek ti P3,000 a napastrekan ti biktima ken ti memory card ti dash cam ti taxi.
Naitaray met ti driver iti pagagasan nga ita ket addan iti natalged a kasasaad kalpasan a nagsagrap ti dunor iti ima daytoy.