KALINGA- Maim-imbestigaran paylaeng ti pakabigbigan ti marijuana runner kalpasan a naglibas daytoy tapno maliklikanna dagiti otoridad idiay Sitio Pokcha, Cagaluan, Pasil, Kalinga.
Maibasar iti report, naglibas ti suspek rason nga imbatina ti karga daytoy a marijuana a naikabil iti timba ti biscuit pakairaman ti motorsiklo a naglugananna.
Immuna a na-flag down ti nasao a marijuana runner iti police checkpoint idiay Dangoy, Lubuagan ngem pinartakanna ti panagpatarayna iti motorsiklo daytoy rason a naliklikanna ti nasao a checkpoint.
Gapu iti daytoy, napagdesisyonan ti nasao a suspek nga ibati ti karga ken motorsiklo daytoy tapno makalibas kadagiti otoridad.
Kabayatanna, naimatangan met dagiti otoridad dagiti nasao a banag isu’t gapuna a dagus a kinitada daytoy ditoy met a nadiskubre-da ti aggatad iti P1.2 million a marijuana dried leaves ken marijuana stalks.
Dagus met a naiturong dagitoy iti Kalinga Police Provincial Office para iti umno a documentasyon ken disposisyon.//Rose
