BAGUIO CITY – Narekober dagiti otoridad ti maysa a paltog iti maysa a waiting shed sadiay Km. 4, Pico, La Trinidad, Benguet.
Sigun iti La Trinidad Municipal Police Station, naka-awatda iti tawag manipud iti maysa a concerned citizen seknan iti mapagduadua-an a nangisisit a backpack a naibati iti nasao a waiting shed.
Dagus a nagresulta ti pulisya ken sadiay nga iti panangsukimatda iti linaon ti bag ket naduktalan a naglaon daytoy iti maysa a paltog, maysa a red jacket ken maysa a facemask.
Kinuna ti pulisya a ti nasao a paltog ket maysa a caliber 38 nga awanan ti markings ken naglaon iti maysa a bala.
Sinukimat dagiti otoridad ti nasao a lugar ngem awan ti nakitada a CCTV camera a makatulong iti panakabigbig ti nangibati iti nasao a bag.
Naiturong metten ti narekober a paltog iti Benguet Crime Laboratory Office para iti safekeeping daytoy.
