BAGUIO CITY – Awan pay laeng ti maitudo a suspek iti panakauram ti nalawa a paset ti Akiki Trail nga agturong iti nalatak a Mt. Pulag sadiay Kabayan, Benguet idi napalabas a bulan ti Pebrero.
Sigun kenni Mt. Pulag National Park Superintendent Emerita Albas, nasurok iti 300 nga ektarya ti nauram a paset ti Akiki Trail.
Nupay kasta, inaklonna nga agingga ita ket awan pay ti nabigbig a responsable iti napasamak nga uram.
Kinunana a maibasar iti inisyal nga imbestigasyon ti opisinada ken ti Bureau of Fire Protection – Kabayan ket naduktalan a maatap a nabaybay-an nga uging ken panag-kaingin ti nangitunda iti uram.
Dinakamatna nga agingga ita ket nagkedked nga agsao dagiti testigo a mangbigbig kadagiti indibidual a mangipatpatungpal ti panag-uging iti paset ti bantay.
Innayon ni Albas nga agtultuloy ti panagsapolda kadagiti dadduma a testigo tapnu makasuan dagiti responsable.
