BAGUIO CITY – Awan ti rumbeng a pagdanagan dagiti umili ti Baguio City seknan iti panagaramat dagiti pulis iti one-meter rattan sticks a maitunos iti baro a pammilin ni PNP chief Gen. Debold Sinas.
Inyunay-unay daytoy ni PCol. Allen Rae Co, dadaulo ti Baguio City Police Office kagiddan ti panangkunana a mas pagbutngan ti publiko no awan ti imet dagiti pulis a rattan sticks.
Sigun kenkuana, daytoy ket gaputa posible a ti naited a paltog dagitoy ti asutenda no adda ti nasken nga anawaen wenno pakalmaenda a naglabsing iti aniaman a linteg, pakairamanan ti health protocol.
Inlawlawagna pay a kangrunaan a rason iti panagimet dagiti pulis iti rattan sticks ket iti panakaipasigurado ti panagtungpal dagiti tattao iti maysa a metro a physical distancing.
Innayonna a last resort dagiti pulis ti panagaramat iti paltog no adda dagiti lumaban a suspek wenno aggandat nga agaramid iti krimen ken no narisgo ti sitwasyon.
