Naobserbaran nga ado dagiti tattao nga agcelcellphone bayat ti pannagnada kadagiti kalsada, sidewalk, pedestrian ken dadduma pay a pagnaan.
Ngem ammoyo kadi ka-Bombo a posible a mangitunda daytoy iti ipupusay?
Nu ngamin agcelcellphone ti maysa a tao bayat ti pannagnana ket saanna a maipokus ti atensyonna iti pagpagnaanna ken kadagiti kasabsabatna.
Sumagmamano metten nga indibidual ti nadisgrasya ken nakadisgrasya gapu iti panagusarda ti cellphone bayat ti pannagnada.
Dadduma kadagitoy ket naipisok wenno natnag iti abot, nabangga ti lugan, nakabangga iti dadduma a tao, naigalis ken dadduma pay nga insidente.
Iti siudad ti Baguio, maipalpalagip manen kadagiti umili ken bisita ti panagtulnogda iti anti-distracted walking ordinance tapno maliklikan iti aksidente.
Karaman iti ordinansa, ti saan a panagusar ti headset wenno airphone bayat ti pannagna tapno mangngeg ti mapaspasamak iti aglawlaw.
Adda metten dagiti nasitar nga indibidual iti siudad gapu iti saanda a panagtulnog iti nasao nga ordinansa.
Dadduma pay kadagitoy ket irasonda nga adda ti emergency call wenno text message a nasken a sungbatanda.
Nupay kasta, saan a rason daytoy gapu ta mabalin pay a sumardeng a magna ken agpaigid tapno sungbatan ti napateg nga awag wenno mensahe.
Dagiti aglabsing iti daytoy ket ireprimand ti otoridad iti 1st offense; mamulta iti P1,000 wenno community service iti 2nd offense; mamulta iti P2,000 ken ag-community service wenno maibalud iti maysa agingga sangapulo nga aldaw iti 3rd offense;mamulta iti P2,500, ag-community service wenno maibalud iti sangapulo ket maysa agingga tallo pulo nga aldaw iti 4th offense.
Sapay koma ta agserbi daytoy a palagip ken ballaag iti publiko tapno mailiklik iti aniaman a peggad.
