![](https://img.bomboradyo.com/baguio/2019/04/2019NLE-1.jpg)
BAGUIO CITY – Mangisayangkat ti Task Force ‘Operation Baklas’ iti siudad ti Baguio ken iti 13 a munisipyo ti Benguet iti panag-ikkat wenno panagbaklas kadagiti amin a campaign materials a maikonsidera nga iligal.
Iti panakiyuman ti Bombo Radyo kenni Atty. Nicasio Jacob, Provincial Election Supervisor ti Benguet, kinunana a maisayangkat inton bigat, aldaw ti Biyernes, Abril 12 ti maikadua a city ken provincial-wide synchronized ‘operation baklas’.
Innayonna aramidenda ti panagbaklas iti tunggal aldaw ti Biyernes agingga iti eleksion malaksid laeng iti Abril 19 a Good Friday.
Inlawlawagna a paset daytoy ti panangwanawanda iti panakaipaskil ken panakaiparang dagiti campaign materials iti Baguio ken Benguet kas maitunos iti linteg.
Inyunay-unayna a nasken a dagiti campaign materials ket maitunos wenno nagtulnog kadagiti tallo a kangrunaan a pagalagadan ti COMELEC kas iti umno a kadakkel ti poster, panakaipaskil ti poster iti common posting area ken ti detalye a nasken a mailanad iti poster.
Impasiguradona a baklasenda dagiti campaign posters a saan a nagtungpal kadagiti pagalagadan ken maimbentaryo dagitoy tapnu agserbi nga ebidensia kontra kadagiti naglabsing a kandidato.
Gapu iti daytoy, kiniddawna met ti boluntaryo a panang-ikkat dagiti kandidato wenno dagiti suppoirters dagitoy kadagiti campaign materials a saan a maitunos iti linteg.