BAGUIO CITY- Nakanselar ti uppat nga aldaw a naituding a pannakaipadas ti panagbyahe ti dua a Hop-on, Hop-off (HOHO) Tourist Bus a programa ti Baguio Tourism Council (BTC).
Maibasar iti warawag ti BTC, liklikanda a makaapektar daytoy iti agbalin a biruk iti sektor ti tranportasyon ditoy syudad.
Nupay kasta, naituding a makitaripnong ti BTC kadagiti myembro ti transport sector iti syudad para iti panggep ti nasao nga HOHO bus.
Maipalagip a babaen iti nasao a serbisyo, maipaayan ti libre a pagluganan dagiti turista a nakarehistro iti VISITA App ken dagiti addaan ti QTP paturong kadagiti nagduduma a pagpasyaran iti siudad a naiyuswat idi Abril 14 ken agingga intun Domingo Abril 17.
Mangrugi ti umuna a trip iti 8:30 ti agsapa ken agleppas ti maudi a trip iti alas 4:30 ti malem.
Agbalin nga staging area ti Convention Center paturong kadagiti pito a tourist destination pakairamanan ti Botanical Garden, The Mansion, Mines View Park, Wright Park ken Governor Pack.
Immuna metten nga inlawlawag ti City Tourism Office a babaen iti libre tourist bus ket maguyugoy dagiti turista a mangiparada iti luganda kadagiti pagdagusanda nga accomodation establishement.
Naipaganetget a babaen iti daytoy ket maksayan ti nailet a gunay ti trapiko a mapaspasaran ita ti Baguio City.
