BAGUIO CITY – Naisayangkat ti World Day of Remembrance for Crash Victims ditoy lokalidad iti panangidaulo ti Land Transportation Office (LTO) – Cordillera sadiay Bokawkan Road, Baguio City.
Sigun kenni LTO-Cordillera Regional Director Francis Ray Almora, panggeo ti aktibidad a maksayan wenno saan met maisardengen dagiti mapaspasamak nga aksidente iti nasao a kalsada.
Kinunana a pinilida ti Bokawkan wenno Buhagan Road a nakaisayangkatan ti aktibidad gaputa kadawyan a sadiay a mapaspasamak dagiti nakakaro a vehicular traffic accidents.
Dinakamatna a dumanon iti 23 nga indibidual ti pimmusay sadiay a disso gapu iti aksidente manipud 2012 agingga 2019.
Mainaig iti daytoy ket impanamnama ni Almora a nainget a mabambantayan ti nasao a kalsada tapnu maliklikan ti panakapasamak pay dagiti aksidente sadiay.
Iti nasao nga aktibidad ket napabendisyonan ti kalsada a sinaruno ti panangitugkel iti kandela dagiti kabagian dagiti nagbalin a biktima dagiti aksidente sadiay ken dagiti sumagmamano a drivers dagiti parapubliko a lugan.
