BAGUIO CITY- Agtultuloy latta ti panagmonitor ti Baguio City Public Order and Safety Division kadagiti agop-operate a balay paginum iti siudad ti Baguio partikular iti asideg ti Baguio City Public Market.
Iti interview ti Bombo Radyo kenni Daryll Kim Longid, dadaulo ti Public Order and Safety Division, kinunana nga ar-aramidenda daytoy tapno maliklikan ti aniaman a saan a nasayaat.
Sigun kenkuana, aglukat laeng dagiti balay paginuman iti oras ti alas dos ti malem agingga alas dose ti agsapa kasta met a mangrugi ti panagaramat ti videoke iti oras metlaeng ti alas dos ti malem ngem agleppas daytoy iti oras ti alas dies iti rabii.
Kabayatanna, impaganetgetna pay a matiliw dagiti operators nga aglabsing iti daytoy.
Iti sabali a bangir, manamnama nga agturong dagiti sumagmamano a task force idiay Singapore inton ngudo iti agdama a bulan.
Daytoy ket tapno makipaset dagitoy iti training mainaing paylaeng iti smoke free policy ken implementasyon tapno mas makaadal pay iti dadduma nga estratihiya tapno maleppedan dagiti agus-usar ti vape ken sigarilyo.
Sigun kenni Longid, nasken a tumulong ti national government tapno malapdan ti panagaramat ti vape agsipud ta adda latta dagiti agilaklako babaen iti online platforms.
