“Glory to God ta Top 6,” dayta ti inyebkas ni Theodore Ngayud Domoguen kalpasan a daytoy ti Top no. 6 iti kaleppas a February 2025 Criminology Licensure Examination.
Iti panakiuman ti Bombo Radyo kenni Domoguen, kinunana a saan a mamati a nakaala daytoy iti 91.65% a rating ken arigna a kasla tagtagainip ti napasamak.
Sigun kenni Domoguen saanna a namnamaen a mairaman daytoy iti Top 10 ngem mamati daytoy a makapasa iti nasao nga eksaminasyon.
Nopay kasta, imbinglayna a pinanggepna a mairaman iti toplist.
“Before actually diyay review mi, adda ti planok talaga nga ag-top 10… idi nangeg ko a talagan a kumaro ni grandmother mi, gapu ti puyat, gapu ti bannog..diyay ti kunakon nga kasla awanen, uray makapasa lang.”
Theodore Ngayud Domoguen
Iti panagreview ni Domoguen,nagbalin a dakkel a karit kenkuana no kasanona a pagsabayen ti panagadalna ken ti panagbantayna iti masakit a lolada.
“Isabsabay ko ti panagreview ken panagbantay kenni late grandmother mi nga pinmanaw idi last year lang, idi madama review, September ket diyay ti pinaka-challenge kenyak no kasanok nga ibalance diyay oras ko ken panagreview san to jay kasla dutyk ditoy pamilya mi, ti panagbantay kenni lola mi.”
Theodore Ngayud Domoguen
Gapu iti dayta, kararag ni Domoguen nga iti naangay nga eksaminasyon dagitoy ket makapasa kasta met ti panangikararag ti lolana kenkuana nga agballigi daytoy.
Saan met a nasayang ti sakripisyo ni Domoguen ken mamati daytoy a saanman a nakita ti lola ti panagbalinna kas Top no. 6 ket naragsak daytoy iti ayanna.
Iti sabali a bangir, madama ti panagpakan ni Domoguen kadagiti tarakenda a manok, saso ken daduma pay sadiay Mankayan, Benguet idi naimessage kenkuana a top no. 6 daytoy.
Nalaos met ti ragsakna iti nasao a resulta.
Kinuna ni Domoguen a bayat ti panagurayna iti resulta ket imbaw-ingna ti pokusna iti panagtaraken kadagiti alaga dagitoy.
Kabayatanna, panggep ni Domoguen a sumrek iti ahensya ti National Bureau of Investigation wenno kas Intel ti Armed Forces of the Philippines.
Nopay kasta, tarigagayna pay laeng a tumulong kadagiti padana a nagboard exam a saan a nakapasa.
Iti panagballigi ni Domoguen, agyamyaman daytoy kadagiti parentesna a kanayon a nangsuporta kenkuna, iti lolana , iti pagadalan daytoy a University of Baguio, iti review center a nagreview-anna ken daduma pay.//Bombo Mera Pacpacan
