BAGUIO CITY – Maiyunay-unay iti publiko ti panangsukimat dagitoy kadagiti produkto a gatgatangenda nangruna dagiti ar-aramaten dagiti ubbing ken dagiti school supplies.
Iti panakiuman ti Bombo Radyo kenni Juliet Lucas, Director ti Department of Trade and Industry – Cordillera, maysa kadagiti kangrunaan nga aramiden dagiti konsyumer kadagiti gatangenda ti panagbasa kadagiti label dagiti produkto tapno maduktalan nu addaan dagitoy ti elemento a posible a narisgu para kadagiti agaramat.
Sigun kenni Lucas, dagiti produkto ket masapol nga addaan iti Philippine Standard Quality wenno Safety Mark ken Import Commodity Clearance (ICC) sticker.
DAPAT IDECLARE NG MGA MANUFACTURERS YUNG MGA ELEMENTS NA NANDOON SA ATING MGA PRODUKTO AT INILALAGAY NILA ‘YON SA KANILANG MGA LABELS.
Kinunana a nu kaspangarigan mapagduduaan ti “authenticity” dagiti marka, mabalin a sukimaten ti kalidad ti mismo a produkto wenno ipakaammo daytoy kadagiti maseknan nga opisina tapno masukimat.
Malaksid iti panagbasa kadagiti label, maisingsingasing metlaeng ti panagaramat iti sensory assessment nu sadino, rumbeng a saan nga ituloy a gatangen dagiti produkto nga addaan ti “toxic” nga angot gapu ta maysa daytoy a pammaneknek nga adaan daytoy ti “harmful elements”.
Innayon ni Lucas a maibasar iti linteg, dagiti mailako a produkto ket rumbeng a saan a maaramatan ti “harmful elements”.
Kabayatanna, imbinglay ni Lucas nga awan ti naobserbaranda a sobra a panagngato ti presyo dagiti school supplies iti rehion nu sadino dagitoy ket agay-ayam laeng iti naipaiyulog a price guides sakbay a nangrugi ti klase.//Bombo Rob Dominguez
