BAGUIO CITY – Imballaag manen ti Public Order and Safety Division a mamulta dagiti pagtagilakuan partikular dagiti awananan ti business permit nga aglaklako ti sigarilyo.
Iti panakiuman ti Bombo Radyo, kinuna ni POSD Deputy Chief Daryl Kim Longid, mamulta iti P1,000 agingga P3,000 dagiti sari-sari store nga awanan ti permit.
Inayonna a mamulta metlaeng iti kapada a gatad dagiti establishemento a mangipalpalubos kadagiti kustomer nga agsigarilyo iti uneg ti pasilidad.
Balballaagan metlaeng ni Longid dagiti turista nga agtulnogda iti Smoke Free Ordinance ti Baguio City gaputa maysa dagitoy kadagiti nawanawanan nga agsigsigarilyo iti parapubliko a lugar.
Impettengna nga agtultuloy ti inspeksyon dagiti personnel ti POSD kadagiti establishemento tapno maipasigurado nga agtultulnog dagitoy iti ordinansa ti siyudad.
